Liña do tempo

Dá os seus primeiros pasos con efémeras bandas de rock, como Los Cables ou Malditos Azules, onde grava as súas primeiras maquetas.

Funda Os Quinindiolas con Xelís de Toro e Pepe Sendón, aos que se une máis tarde Marcos Teira. Publican un disco homónimo en 1991, reeditado en 2009 por A Regueifa.

Foi un dos fundadores da Sala Nasa e formou parte da compañía de teatro Chévere, canda Xesús Ron, Miguel de Lira, Pepe Sendón, Blanca Cendán, John Eastham e Carlos Santiago. Participou nalgúns espectáculos como actor e compuxo temas para a Banda da Nasa. Déixao en 1998.
[Na imaxe, Fran probando maquillaxes- Foto cedida por Chévere]

Premio da Crítica ao mellor musical do 1996, en Barcelona, pola ópera cómica Annus horribilis (con libreto de Pepe Sendón), de Chévere.

Xunto a compañeiros de aventuras musicais anteriores, como Carlos Santiago, Pepe Sendón e Marcos Teira, forma a Psicofónica de Conxo, que publica dous discos: Psicópolis (Fortes & Rangel, 2001) e Extramundi (Madame Mir, 2002).

Crea unha nova identidade e convértese en Narf. Publica o seu primeiro disco, ‘Directo en Compostela’, gravado en directo na Borriquita de Belem en xullo de 2003.

Co vasco Jabier Muguruza e o valenciá Miquel Gil conforma “Mundo Café”, un espectáculo co que percorren a Península e finalmente publican un disco, tamén homónimo (Gintonic diskak, 2005).

Coa banda mozambicana Timbila Muzimba crea o proxecto Bumba no que o seu talento se mestura cos sons do pobo chopi. Recuperarían esta colaboración dez anos máis tarde. Este mesmo ano acada un segundo posto no concurso de canción en linguas minorizadas europeas, Liet Lavlut celebrado en Suecia, co tema Santiago.